Sofía a vaca que amaba a música

Maravilloso relato creado para abordar o tema da discriminación. Está protagonizado por animais, que lles encantan aos nenos/as, pero ademais é a historia de alguén que sofre o rexeitamento polas aparencias e prexuízos que moitos senten, aínda desde os primeiros anos. Sofía atopa nas cancións unha forma de expresar as súas emocións . Este conto é unha invitación á constancia, á aceptación, á superación de retos e á amizade: unha chamada de atención ao absurdo de tratar aos outros como inferiores cando todos/as, en realidade, temos algo único e especial para aportar. A través da modelaxe con plastilina, os nenos/as amosaron o reflectido na historia.

Taller sobre o consentimento

O pasado venres realizouse no noso centro un taller sobre o consentimento. Dita actividade foi realizada por Femuro (Federación provincial de Mulleres Rurais de Ourense). Dende Femuro traballan cada día por acadar a igualdade entre homes e mulleres, nenos e nenas. Por este motivo están moi implicadas na coeducación tanto no ámbito familiar como escolar. Dende a entidade ofertan actividades de sensibilización en igualdade tales como o Taller de consentimento que se desenvolveu nas aulas de 4º, 5º e 6º de Educación Primaria.

O valor da amizade

Retomamos na aula o programa de educación emocional. Mediante o uso dun exemplo concreto (visionado dunha historia), pretendemos que os nenos/as comprendan mellor a importancia da amizade. Posteriormente fixemos preguntas abertas para involuclar aos integrantes da aula: Quenes son os teus amigos/as? Como te fan sentir?... Falamos das calidades dun bo amigo/a: amable, divertido, que te escoita, te apoia, ensina a resolver conflitos (os amigos/as poden ter desacordos ou problemas, pero o importante é falar e atopar solucións xuntos en lugar de pelexar), os amigos/as están nos momentos bos e nos malos (cando máis os necesitamos). Debemos amosar aos nenos/as como ser un bo amigo/a a través do seu comportamento. Esto terá un impacto positivo na comprensión do valor da amizade.

Programa de control de esfínteres

No desenvolvemento evolutivo infantil, o control de esfínteres efectúase ao redor dos dous-tres anos, aínda que esta idade pode variar segundo a madurez do neno/a. Este hábito ten gran importancia tanto para a familia como para a axeitada integración do neno/a no seu entorno escolar e social, pero sobre todo para o alumno/a polo feito de alcanzar un gran progreso na súa autonomía persoal.

Reunión REDE RAOGAL

O pasado xoves 5 de outubro tivemos unha reunión no IES Vilamarin. Dito centro forma parte da REDE RAOGAL e constitúe unha Unidade de Acompañamento e Orientación persoal e familiar (UACO). Dá cobertura a todos os centros educativos sostidos con fondos públicos dependentes da Consellería de Cultura, Educación, Formación Profesional e Universidades, do seu ámbito de actuación. Cada UACO está constituída por unha persoa responsable do desenvolvemento de actuacións de apoio e seguimento ao alumnado especialmente vulnerable, así como das súas familias, escolarizado en centros sostidos con fondos públicos, e deberá contar con formación específica acreditada en mediación, habilidades sociais, e educación emocional. As UACO teñen como función específica acompañar as traxectorias educativas do alumnado máis vulnerable e as súas familias, para previr fracasos e promover a aprendizaxe e éxito escolar, sempre en colaboración e coordinación cos e coas profesionais que estean a intervir co devandito alumnado.

Equipo de Mediación

A mediación é unha medida educativa que intentamos levar no centro para axudar ao alumnado a resolver os seus conflitos dunha forma pacífica, a través do diálogo e buscando xuntos solucións satisfactorias para ambas partes. Os alumnos/as de 5º e 6º de Educación Primaria participarán na implementación de dita medida.